مشكلة العشوائيات من المعضلات الضخمة فى مصر ومن أكثر القضايا إلحاحاً، نظراً لما لها من انعكاسات اجتماعية واقتصادية وأمنية تهدد أمن واستقرار المجتمع وقد حاولت الحكومات المتعاقبة على مدى عقود حلها ولكن دون جدوى وتوالى بناء العشوائيات بعد فشل السلطات المتعاقبة فى وقف نمو الظاهرة ويعانى سكان المناطق العشوائية بجميع فئاتهم العمرية خاصة الشباب يعانون من التهميش، ويعيشون فى بيئة ملوثة تفتقر إلى النشأة السليمة وإلى الكثير من الخدمات الأساسية وفى جولة سريعة لمنطقة أبو قتادة التى تعد من أشهر مناطق الشعبية فى مصر، ومن أكثر مناطق التى يتجمع بها السكان فى القاهرة والتى تقدر بحوالى نصف مليون مواطن يعيشون بها وتتجمع فيهم شيم الأصل والكرم وجدعنة أهل البلد. فبرغم من قرب المنطقة من جامعة القاهرة الصرح التعليمى الكبير، إلا أن المنطقة الفاصلة بين العزبة وخط مترو الأنفاق يتعانى من التهميش وتدنى الخدمات التحتيه بها من تعكر مياه الشرب تاره وقطع الكهرباء تارة اخرى بالساعات يوميا، التقى محرر السوق العربية بعدد من اهالى شارع القرش حارة الجمل لمناقشة ابرز المشاكل التى تتلخص فى قطع الكهرباء بالساعات عنهم وتعكر مياه الشرب بمياه الصرف وايضا ابرز المطالب الذى يتمنوها من الرئيس القادم.

ويقول احمد رمضان أحد سكان العزبة ويعمل كهربائى: نفسى يبقى فى اهتمام اكتر بالشباب يبقى فى توفى وظائف اكتر لينا وتعديل قانون الايجارات الجديد وده مدمر الشباب نهائيا انا بدفع إيجار بـ500 جنيه وبدفع مياه وكهربا حوالى 200 يعنى 700 جنيه لما ادفع بس كل شهر 700 جنيه اكل اولادى منين غير ان الايجار ده بيتجدد كل سنتين اطالب الحكومة الاهتمام بالمهن الحرة الاهتمام بإسكان الشباب وتوفير وحدات سكنية لهم وتوفير فرص العمل اكتر وقمت بتقديم طلب فى مشروع اسكان الشباب ولكن لا حياة لمن تنادى، وأطالب الرئيس القادم بإعادة النظر فى القوانين الجديدة وتفعيل اكتر لدور الشباب يكون فى تنمية حقيقية للشباب وايضا بطلب من الرئيس القادم انه لازم يهتم بالتعليم والصحة هما دول اللى هيصلحوا حالنا لو اهتمينا بالاتنين دول انا عايز اعلم ولادى تعليم كويس ولما اتعب ابقى ضامن انى هتعالج كويس.

كريمة عبدالله احد سكان العزبة وتمتلك كشكا لتجمع قوت يومها تقول: انا عندى 63 سنة وبتحصل على 300 جنيه من التأمين ولا تكفى الايجار واتمنى يبقى فى رقابة شوية من الحكومة على الاسعار ويهتموا بينا شوية واتمنى من الرئيس القادم ياخد بأيد الشباب ويصلح من الحال البلد احنا تعبنا ونفسنا نشوف البلد احسن بلد فى الدنيا ويفك الزنقة عننا، وبسؤالها عن سبب احتفاظها بصورة عبدالناصر الى الان؟ قالت لا بعده ولا زيه ولا هايجى زيه، مهما كان لا احد يقدر يبقى فى مكانة عبدالناصر ده حبيب الملايين، الراجل ده حارب الدنيا عشاننا احنا امم لينا القناة وبنالنا السد العالى، اى كان الرئيس الجاى نأمل فى إعادة النظر لينا ويشوف حل لمشكلة النور، مشكلة المياه لسه موجودة مياه معكرة بالمياه المجارى ده كمان غير سعر الانبوبة اللى وصل دلوقتى بـ10 جنيهات الحياة صعبة، بس اتمنى البلد تستقر والرئيس القادم يتقى ربنا فينا.

ويقول عم على: انا راجل على المعاش باخد 500 جنيه وبدفع إيجار 250 جنيها لازم الحكومة تهتم بفلوس المعاشات واسترداد فلوسنا اللى اتسرقت من وزارة المالية قولى 500 جنيه يكفونى ازاى فى الزمن ده غير ان مش بيوصلى مياه حلوة، وبنروح نملى مياه عشان نشرب، انا عايز من الرئيس الجاى ان هو يوفر لنا ان الواحد يعرف ياكل ويشرب، يوفرلنا حياة كريمة احنا مش بنطلب المستحيل احنا بنطلب حاجات بسيطة جدا اقصى امانينا ان احنا نعيش مستورين هو ده طلبنا لاننا تعبنا من البهدلة.

ويقول محمد حسن احد سكان حارة الجمل وهو يعمل بمطعم فول وطعمية: الوضع دلوقتى مش حلو مفيش امان خالص السلاح كتر فى العزبة بشكل مش معقول واى خناقة بتحصل لازم يبقى فيها ضرب نار لازم الحكومة يبقى ليها هيبة مفيش مياه بتوصلنا نضيفة ولازم الرئيس القادم يشوف حل لأهالى العشوائيات والشباب احنا متبهدلين ومحتاجين شغل بجد. ويقول احمد حسن: انا عشان اعرف اعيش سيبت الشقة اللى مأجارها وبعت العفش وقاعد دلوقتى مع امى يعنى هاكل منين لما الايجار دلوقتى بيوصل لـ400 جنيه ومحتاج أأكل مراتى وعيالى وبرضه مش هبقى مكفى، نفسى الرئيس الجاى يهتم بينا.

الحاجة رشيدة محمد احد سكان حارة الجمل: والله اكتر مشكلة دلوقتى معذبانا هى الكهربا لانها بتتقطع هنا وبينسونا بتقعد بالساعات مشكلتنا هنا فى الانابيب من سنتين كانت الانبوبة بـ6 جنيه وكنا راضيين وايام الاخوان بقت بـ8 جنيه ودلوقتى بـ10 جنيه طب لحد امتى؟ وليه بنحب نستغل ازمات بعض والكهربا بتقطع كتير لدرجة ان فى اجهزة ضربت ولازم الحكومة الحالية تشوف حل فى الاسعار. نفسى الرئيس الجاى يتقى ربنا فينا احنا مش طالبين كتير.