زيارة الرئيس مرسى لروسيا

هي: بيقولك مصر طلبت من روسيا قمح.. وروسيا ردت معندناش.. وطلبت.. وطلبت..ولا حياة لمن تنادى.. أنا بقولك الناس بتقوله!

هو: الناس مش حتبطل كلام. الوضع فى مصر مازال غير مستقر عشان كده الكلام كتير وحيكتر! لكن اللى عايز اقوله إن زيارة الرئيس مرسى كانت زيارة ناجحة وناجحة كده..!

هى: احكيلى يا حبيبى ياللى مفيش غيرك يحكيلى

هو: شوفي.. الرئيس مرسى كان نازل فى منتجع سوتشى على ضفاف البحر الأسود. وأعرب عن تطلع مصر للحصول على دعم روسيا خلال الفترة الانتقالية التى تمر بها مصر.

هى بدون مقاطعة لكلامك.. ماخدتش بالك من حاجة؟!

هو: ماخدتش بالى من إيه؟! قصدك ايه؟!

هي: الرئيس راح الصين وراح روسيا.. وأمريكا مش فى الصورة!!

هو: برضه مش فاهم؟!!

هى: لا انت فاهم.. وعارف أنا قصدى إيه.. فيه إعادة ترتيب أوراق.

هو: أوراق ايه احنا بنلعب كوتشينة؟

هي: يا عم اسمعني.. لا كوتشينة ولا استغماية فيه سياسة جديدة.

هو: قصدك رؤية مصر مستقبلية؟

هى: قول زى ما انت عايز تقول.. المهم فيه سياسة لغاية دلوقتى مش واحضة قدامنا!! وفى ضوء النتائج حنعرف إذا كان سياسة ناجحة وفيها خير لمصر والأمة كلها ولا لأ.

هو: على فكرة نفس كلامك ده كان سؤال وجه للرئيس المصرى وكان رده علاقات مصر بأمريكا علاقات وطيدة استراتيجية وجذورها قوية وهناك مجالات كيرة للتعاون وسيبك من كلام الناس!!

يا عم ده مش كلام ناس.. والناس فى النهاية بتتكلم عن حاجة شايفاها!!

هو:فى حاجات كثير مش ضرورى تشوفيها احنا ياما شوفنا لكن النتيجة ايه ده المهم!!

والرئيس مرسى عايز يعمل حاجة عايز الخير لمصر وماتنسيش التاريخ بيكتب والرئيس وغيره يمهه أوى الخروج من النفق المظلم، وبأكد أنه كان صح وكان على حق لما قال «نهضة مصرية» الرئيس المصرى راح الصين وراح روسيا وجولاته مستمرة وحتستمر والشارع حيقول راح هنا ومارحش هنا.. وكل واحد بكلمة!! وكل واحد برأى!! لكن فى النهاية الراجل ربنا يقويه وإن شاء الله حيثبت للناس كلها أنه رئيس محترم وقادر على قيادة مصر.

هي: الأيام بيننا!!!

هو: من يتقى الله يجعل له مخرجا

هي: يارب الخير لمصر وللعرب