فى مصر إحباط تهريب 201 قطعة أثرية وتأجيل محاكمة الجاسوس الأردنى لـ 16 يونيو

هي: ومين صاحب عملية التهريب.. ياعمنا؟

هو: شخص أردنى الجنسية كان بحوزته كمية كبيرة من القطع والعملات الأثرية كان بيحاول تهريبها من ميناء نويبع.

هى: والأردنى ده مالوش اسم والا بلاش يحسن يكون سر من الأسرار الحربية المهم القصة ايه بالظبط؟

هو: معلومات وصلت لأمن الموانئ فى مصر وكانت التعليمات بمتابعة الشخص الأردنى وتبين قيامه بإخفاء كمية كبيرة من الآثار كان اشتراها من بعض تجار الآثار لتهريبها إلى الأردن عبر ميناء نويبع، وتم الضبط والعثور على ثلاث حقائب بداخلها 11 تمثالا و8 قطع أوانى فخارية و101 عملة معدنية وثلاثة أقنعة ووجه فرعونى و7 خواتم معدنية وعيون معدنية لحورس واحجار عليها نقوش فرعونية.

هي: وإيه حكاية الجاسوس الأردنى هى ناقصة؟!! يا سبحان الله رغم أن اخواتنا فى الأردن ناس زى الفل.

هو: ماقلناش حاجة.. زى الفل لكن كل بلد فيه الفل وفيه الطين.. فيه الحلو وفيه الوحش.. فيه المحترم وفيه غير المحترم.. والحرامية والجواسيس دلوقتى على قفا مين يشترى.

هي: والله العظيم القفا ده صعبان عليا أوى انضربنا على قفانا كتير.. يا عمنا المهم مين الجاسوس الأردنى ده.. ولا برضه سر حربي؟

هو: لا مش سر ولا حاجة.. اسمه بشار أبوزيد، ومحبوس دلوقتى فى مصر ومعاه ضابط مخابرات اسرائيلى هارب واسمه اوفير هيرارى.. وتهمتهم التخابر لصالح اسرائيل وذلك بتمرير المكالمات التى تتم داخل مصر الى اسرائيل والاضرار بالمصالح القومية لمصر.

هي: قلبى معاكى يا مصر.. حتلاقيها منى ولا منين؟