وزير العدل المصرى يؤكد مصر رقم 116 من 160 دولة فى مجال مكافحة الفساد.

هى: الموضوع ده.. أصله وفصله إيه؟

هو: المستشارأحمد مكى وزير العدل قال إن الوزارة بتسابق الزمن لوضع حزمة تشريعات قبل شهر يونيو القادم أملاً فى حصول مصر على مركز أفضل فى مكافحة الفساد بعد تراجعها للمرتبة 116 من 160 دولة.

هى: الكلام ده.. هو الكلام.. عايزة أقول.. إن مشكلة مصر الحقيقية تكمن فى الفساد وأمور اقتصادية مهمة مطلوب إصلاحها.. بقرارات.. بقوانين.. المهم مطلوب التحرك للأمام الفساد والنهب فى مصر مازال على ودنه وفيه ناس عايزة الأوضاع فى مصر تفضل على ما عليه الحال الآن، الأضرار بعيدة عنهم والسرقة عينى عينك وكله بالقانون وناس عارفة هى بتعمل ايه؟ مصر 116 من 160 دولة فى مجال مكافحة الفساد ولو فضلت الأمور كده حنبقى المركز 160 بجدارة.

هو: فيه إجراءات بتتخذ فى الموضوع ده وبالتالى مع الاستمرار حتكون فيه نتائج إيجابية تؤدى إلى تحجيم الفساد وإزالته.

هى: إزالته.. إزالته شىء صعب لكن نقول تحجميه زى ما حضرتك قول فى الأول عشان نقدر نقلل من حجم عجز الموازنة العامة ونقدر ننزل للطبقة السفلى من الشعب اللى بيقولوا عليها.. طبقة الغلابة اللى بتعانى من كل حاجة وهى البعيدة كل البعد عن أى حاجة!! وعشان كده لازم نعرف ونحذر الناس دى اوعو تيجوا جنبها.. الناس دى زهقت وفاض بيها، ولو فضلنا نخنق فيهم حتطلع من جحورها وحتجيب عاليها واطيها!!

هو: عاليها إيه وواطيها إيه.. إحنا عايشين فين بالضبط؟

هى: عايشين فى مصر يا حبيبى اللى العربيات بتتسرق من أصحابها فى عز الظهر واللى بيتكلم بيموتوه.. عايشين فى مصر يا حبيبى.. بيت الريس نفسه بيحدفوه بالمولوتوف.. عايشين فى مصر يا حبيبى.. اللى مجمع التحرير بيتقفل وخلى مسئول يهوب هناك.. مصر يابا الحاج مولد.. مولد وصاحبه غايب.. وعرفت إحنا عايشين فين.. بالضبط عايشين فى بلد مافيهاش أمن مافيهاش أمان.. مافيهاش أى حاجة وربك يستر؟