فى مصر تفعيل لأعمال وزارات الصحة والكهرباء والرى وعلاج العاملين بوزارة الصحة بالتأمين الصحى وترشيد إنارة الشوارع لتوفير 700 ميجاوات وفى مجال الرى حفر 330 بئراً جوفية قبلى وبحرى.

هى: قبل ما نخوش فى قصة الكهربة والصحة والرى شفت اللى حصل فى البدرشين والقطارات اللى دخلت فى بعضها وعساكر الأمن المركزى اللى راحت؟!

هو: شفت وكلنا شفنا.. ربنا يصبرنا!!

هى: ربنا يصبرنا.. ده اللى قدرنا عليه عشان تعرض بس.. عندنا فى مصر كل يوم مصيبة والمسئول من دول فى قمة السلبية.. مفيش حد بيتحرك والنتجة الغلابة بتموت وأسر بتتدمر يا ناس خلى عندكو شوية دم.. يا ناس يا مسئولين اتحركوا.. اعملوا حاجة.. إدونا إحساس إن المواطن فى مصر ليه قيمة.. لكن لا حياة لمن تنادى.

هو: وزارة النقل مستمرة فى سياسة التطوير وتفعيل أعمالها من يوم حادثة قطار أسيوط اللى راح ضحيته 51 طفلا وحادث البدرشين وارد يحصل.. ويحصل فى أى وقت وفى أى بلد.

هى: طالما ده ردك أنا مش خاخد ولا حادى معاك فى الكلام أكتر من كده.

هو: ليه بس.. أنا بتكلم بصراحة.. البلد بتعانى من حالة عدم الاستقرار والمرحلة الانتقالية.. فيه شغل فيه عمل لكن مش بالشكل المطلوب للأسباب اللى قلت لحضرتك عليها.

هى: معلش يا أفندي!! عدم الاستقرار والمرحلة الانتقالية دى كلها شماعات فى دولاب السلبية المصرية المسئول من دول جاهز بالرد.. أصل ومأصلش ولا شغل ولا إخلاص ولا عمل ولا أى حاجة.. يا عالم ارحموا نفسكو اللى مش قد الكرسى يتكل على الله يمشى وييجى واحد تانى يشيل المسئولية ويشتغل.. يا راجل بلا هم الله يكون فى عون المصريين من المسئولين المهملين اللى عايشين بس على المنظرة والبيه راح والبيه جه.. البيه عمل إيه.. معملش حاجة ومش حيعمل حاجة وابقى قابلنى ولو الأمور مشيت على كده قول على مصر السلام.

هو: مصر ربنا حاميها!!

هى: أيوه أيوه ده اللى إحنا شاطرين فيه نغنى نرقص نهتف لكن نعمل حاجة مبنعملش حاجة لأننا بصراحة إحنا ولا حاجة.

هو: الخلاصة.. عايزة تقولى إيه؟!

هى: عايزة أقول لازم عملية نضافة كبيرة فى كل الجهات الحكومية وغير الحكومية.. مسئولين شباب.. شباب يقدر يتحرك يقدر يفكر يقدر يعمل يقدر ينتج.. فكونا بقى من عواجيز الإدارة.. الناس اللى كبرت وفكرها ما اتغيرش عناصر الخبرة والمتميزين منهم فوق راسنا من فوق غير كده بالسلامة يا حبيبى شوف طريقتك عايزين نلحق المركب قبل ما تغرق