تحديث وتطوير السكة الحديد المصرية

هى: انت فتحت موضوع.. وقضية ما يعلم بيها إلا ربنا.

هو: مصر كلها مشاكل.. لكن مشكلة المزلقانات والسكة الحديد مهم جداً إن إحنا نتكلم فيها من وقت للتانى.

هى: ياعم فكها سيرة وغير الموضوع مش ناقصين حوادث.. ووجع قلب.

هو: على العموم الكلام النهارده بيطمن! المزلقانات الرسمية فى مصر 1332 مزلقان قيد عمليات تطوير تتم الآن.

هى: كل المزلقانات عايزة تطوير؟

هو: لأ.. فيه 400 مرتبطة بنظام السيمافورات ولا تحتاج لتطوير لكن الآن فيه أعمال تطوير لعدد 171 مزلقان وهناك مناقصة قاربت على الانتهاء لتطوير 150 مزلقان سبق وأن أعلن عنها هشام قنديل رئيس الوزراء المصرى.

هى: يعنى ممكن نقول أن إجمالى ما يتم تطويره الآن 321 مزلقان.

هو: بالضبط كده.. وده يمكن الانتهاء منها بنهاية العام الحالى.. خاصة أنه بالفعل تم الانتهاء من عدد 250 مزلقان.

هي: هات من الآخر وقوللى.. باقى كام مزلقان ونخلص من القضية دى.

هو: باقى 550 مزلقان وده فعلاً اللى محتاج تطوير وحيتم ذلك من خلال طرحهم فى مناقصات.

هى: المزلقان.. تطويره بيتكلف كام.

هو: 2 مليون جنيه.

هى: يعنى تطوير المزلقانات حيدخلنا فى ملايين!

هو: طبعاً فيه حاجة ببلاش.

لكن فيه اعتمادات مالية متوافرة بالفعل تقدر بـ642 مليون جنيه لتطوير 321 مزلقان.

هى: حيبقى باقى 550 مزلقان.

هو: اعتماداتها المالية حيتم إدراجها فى الميزانية الجديدة للعام المالى 2013/2014.

هى: على خير وسلم لى على المجرى؟!