كشف المهندس محمد أبوالعلا، رئيس الشركة العالمية لمهمات الحفر والتنقيب عن البترول النقاب عن اجمالى الاستثمارات اللتى تنفذها الشركة فى مصنع العين السخنة بلغت 56 مليون دولار، مقارنة بـ 16مليون دولار كانت حجم الاعمال السنوى بها، وارتفع الى حوالى 45مليون دولار سنويا.

وقال فى حوار خاص مع "السوق العربية" ان استثمارات المرحلة الثانية للشركة بالمصنع والتى تنفذها الشركة حاليا تقدر بنحو 40 مليون دولار.

ورفض التعقيب على ما يردده البعض ان قيادة المهندس سامح فهمى لوزارة البترول كانت من انجح فترات قطاع البترول فى مصر، وقال مقدرش اقيم حاجة انا كنت جزءا منها، واعتقد ان من كانوا خارج المنظومة اقدر منى على التقييم، لان تقييمى ممكن الا يكون محايدا.

والمهندس محمد ابوالعلا تخرج فى كلية الهندسة جامعة القاهرة 88 تقدير عام جيد جدا وعمل لمدة 33 عاما فى قطاع البترول منها 30 عاما فى شركة بتروجت وتلاها الشركات التابعة لها ولا يزال على قوة بتروجت واخر شركة عمل بها قبل منصبه الحالى ترؤسه شركة p.s وكانت من انجح الفترات لهذه الشركة رغم انها لم تتجاوز العشرة اشهر.

وفيما يلى تفاصيل الحوار معه :

■ البعض يردد أن فترة قيادة المهندس سامح فهمى وزارة البترول من أنجح فترات قطاع البترول.. ثم تعاقب من بعده وزراء للقطاع.. تقييم حضرتك لهؤلاء الوزراء؟

- أنا مقدرش أقيم حاجة أنا جزء منها، أعتقد أن اللى خارج المنظومة قادر على التقييم لأنه تقييمى ممكن ميبقاش محايد. كل وقت وله معطياته ومش بالضرورة ممكن يكون حد كويس ومينكتبش له النجاح والعكس ده بيكون وفقا للظروف اللى بيمر بيها. مش هقدر أحكم لأنى جزء منه.

■ الشركة العالمية لمهمات الحفر والتنقيب فكرة انشائها؟

- انشأت فى بداية عام 2009 قطاع البترول فى ذلك الوقت كان لازم يكون عنده شركة توفر له الخامات والمواسير بتاعة حفر الابار دخلوا فى شراكة مع شريك صينى وانشأوا الشركة ديه والمصنع الموجود حاليا فى العين السخنة وكان المرحلة الأولى منه اللى هيا شغالة حاليا بتمثل حوالى 28% من المنتج وبمرور الوقت تقريبا 4 سنوات لقى الشريك الأجنبى نفسه بيكسب كويس والشريك المصرى مبسوط بدأ فى المرحلة التانية. المرحلة دى اضيف حوالى 18% بحيث أنك تقدر تقول 30% من كل الماسور موجود هنا فى مصر بعد كدا احنا شغالين لقينا السوق واعد وحجم الإنتاج مطلوب قررنا نعمل 100%من الماسور هنا فى مصر دا المرحلة التالتة اللى سوف تقوم حاليا تحت الدراسة استثماراتها حوالى 250 مليون دولار واللى فات استثمر فيه حوالى50 مليون دولار باجمالى استثمارات 300مليون دولار.

■ من الشريك الأجنبى والمساهمين فى الشركة؟

- تقدر تقول 50% الشريك الصينى شركة صينية تسمى s.o.g و50% ثلاث شركات من قطاع البترول هم شركة جنوب بنسبة 20% انبى 15% وبتروجت 15%.

■ ماذا عن مصنع العين السخنة؟

- الاستثمارات فيه كانت 16 مليون دولار حجم الأعمال السنوى بيوصل لحوالى 45مليون دولار سنويا وفى نفس الوقت بنعمل استثمارات تانية فى المرحلة التانية اللى هيا شغالة حاليا بـ40مليون دولار يبقى كدا اجمالى الاستثمارات 56 مليون دولار.

■ ما رؤيتكم للمؤتمر الاقتصادى؟

- بإذن الله أكيد طبعا حجم العقود الل اتمضت والاتفاقيات تزيد على 26 مليون دولار طبعا ان شاء الله هيكون فيه خير للقطاع البترولى وبالتالى خير للبلد.

■ ما رأيك فى شركات القطاع العام وحالات التذمر منها وعنها.. ضعف اداء.. أم ضعف عمالة؟

- كل شركة ليها أسبابها للخسارة فى مصر تكمن المشكلة فى الادارة لو شفت الصناعة والكهرباء والزراعة هتلاقى المشكلة واحدة تكمن فى سوء الإدارة احنا معندناش ناس مؤهلين بشكل كافٍ لأدارة المشروعات او الشركات الكبيرة. الموضوع على مستوى جميع القطاعات مش قطاع البترول بس الأربع سنين اللى فاتوا أثروا بشكل كبير جدا، فيه شركات قدرت تتحمل وتطلع من المشكلة من غير ما تصاب بأى خسائر وفيه شركات مقدرتش طبعا دا خسارة مجمعة نتيجة تراكم السنوات السابقة أدت أنه الموقف المالى بتاعهم مش كويس.

■ ماذا عن مصنع العين السخنة هل هو تكرار للتجربة فى الصعيد او غيره؟

- احنا المرحلة الأولى استثماراتها 16 مليون دولار والشركاء أخدوا فى الأربع سنين اللى فاتوا 80%من اللى هما دفعوه، بمعنى اخر ان اللى دفعوه هياخدوه على 5 سنين ودا السبب اللى خلاهم دخلوا بعد ما لقوا انفسهم اخدوا 60% من اللى هما دفعوه قرروا أنهم يستثمرون اكتر ووصلوا من 16 مليون دولار الى 56 مليون دولار. ولأن برضه السوق واعد قرروا انهم يزودوا فى 3 سنين من 56 مليون دولار الى 300مليون دولار دا يدل ان الشركة او الادارة برئاسة المهندس محمد الجوهرى اللى كان قبل منى او الادارة الحالية الحمد لله الشركة ماشية وفى تقدم وحجم الأعمال بتاعنا بيزيد سنويا، السنة اللى فاتت من السنة دى حجم الأعمال زاد حوالى 50%. الناس مش لاقية شغل احنا عندنا زيادة فى حجم الاعمال وبرضه السعر العالمى للبترول نزل مش زى ما كان قبل كدا من سنتين مثلا قدرنا ان احنا نشارك الدولة فى مشروع المليون فدان وبنورد مواسير حاليا للقوات المسلحة وزارة الرى ووزارة الزراعة لمشروع المليون فدان بنوع فى السوق.والسوق يستوعب ذلك.

■ هل من الممكن ان تكون هناك شراكة بين القطاع البترولى والقوات المسلحة؟

- بالنسبة لينا الشركة العالمية لتصنيع مهمات الحفر المساهمين بتوعنا ناس عندها سيولة مادية مش محتاجين مساعدة او شراكة مع أى مؤسسة من مؤسسات الدولة احنا قدرنا فى 3 سنوات نوصل حجم الاستثمارات الى 300مليون دولار يعنى 2مليار جنيه ولو طلب اكثر من ذلك لا يوجد مانع فى زيادة الاستثمارات واذا احتاجت القوات المسلحة انها تدخل معانا فى شراكة أهلا وسهلا طبعا.

■ لو المهندس محمد أبو العلا كلف بحقيبة البترول.. ماذا يفعل؟

- مينفعش..لأنه بقالنا 30 سنة مش عارفين نوفر انبوبة البوتاجاز صح ولا غلط انا واحد من الناس بشترى الانبوبة بـ80جنيها وانا شغال فى قطاع البترول هى دى الحقيقة. هناك سوء فى الادارة فيه مشاكل فى السولار والبنزين تولى الحقيبة فى ذلك الوقت احراج.

المسئول لازم يكون عنده حاجتين مهمين لازم يبقى عارف هوا عايز ايه. وهيعمله ازاى لو هو عارف عايز ايه ومش عارف هيعمله ازاى يبقى هيكون مسئول فاشل. والتقصير فى الجزاءات التى تندرج تحت بند فشل الادارى.

■ هل أنتم عن قناعة بمبدأ توحيد الأرباح للعاملين؟

- مبدأ توحيد الأرباح عامل زى سياسة التموين زمان كله جمعية استهلاكية. مينفعش يكون حد بيشتغل 10 ساعات واساويه بواحد بيشتغل 20 ساعة دور على اللى تربط الحافز بالانتاج. كلما زاد الانتاج زاد الحافز. لا يصح تساوى الشركات الخاسرة مع الشركات اللى تحقق مكاسب. ربنا سبحانه وتعالى قال فى كتابه الحكيم "لايستوى الذين يعملون والذين لا يعملون" صدق الله العظيم.

■ سقوط نظامين متتاليين تفجرت مشاكل وازمات عديدة.. ما تعليقك؟

- لابد من وجود حل جذرى للمشاكل دى مفيش حاجة اسمها صعب او مستحيل انا لما توليت p.s كانت الشركة خسرانة جبت مراكب. لكل واحد رؤية معينة ومحددة لكى تكون ناجح مش لازم نعلق الفشل على الشماعة لو عايز تكون ناجح هتكون ناجح.

■ البعض يتهم المهندس شريف اسماعيل خلال توليه الوزارة بظهور العديد من المشكلات؟

- استمراره فى الوزارة مالوش غير معنى واحد وهو نجاحه فى مهمته.

■ ما تقييمك للاداء الاقتصادى خلال الفترات السابقة؟

- تعرضنا لمشكلة كبيرة جدا فى الايرادات السنوية بتاعة الدولة كان بييجى 15 مليار دولار من السياحة سنويا وطبعا السياحة تأثرت جدا علشان تقول 4 سنين فى 15 مليارا يبقى الاجمالى 60 مليار دولار.معنى كده اننا عايزين 4 سنين علشان نعوض الخسائر اللى حصلت دى او تعلى الانتاج بتاعك اكتر من الفترات السابقة علشان تقدر ترجع زى الاول ولا ننسى مساندة دول الخليج ولكن علينا الاعتماد على انفسنا بالعمل وزيادة الانتاج.

■ ما رأيك فيما حدث وما سمى ثورات "الربيع العربى"؟

- الثورة بتغير بس بتاخد وقت كبير علشان توصل لأهدافها. الثورات عموما بتاخد وقت علشان الشعب يفوق الاربع سنين اللى فاتوا حصل هبوط فى الاداء والايرادات احد الامور البسيطة خاللص كان بيدخل 60 مليار جنيه سنويا من السياحة لابد من العمل وزيادة حجم الأعمال والاستثمار.شايف ان القيادة الحالية ماشية كويس جدا بس برضه هتاخد وقت لو عملنا مقارنة بين ثورة 25 يناير وثورة 30يونيو سوف نجد ان حياة المواطنين تغيرت توجد ازمة سولار ولكن مش زى ما كان بيحصل قبل كدا ان طول الوقت فيه ازمة الوضع اتغير من 30 يونيو احسن جدا ولا ننسى دور دول الخليج فى مساندة الاقتصاد المصرى.

مع الوقت سوف يشعر المواطن بتحسن فى المعيشة أى ثورة فى العالم بتاخد وقت علشان تحقق اهدافها.

■ ماذا عن الحروب التى تشهدها المنطقة العربية؟

- دى حرب على الأمة العربية بالوكالة مرة اسمهم داعش ومرة ايران ومرة بيت المقدس تختلف الاسماء ولكن الهدف واحد وهو مصلحة اسرائيل.

■ ما تقييمك لوزارة البترول خلال تولى سامح فهمى الوزارة ؟

- المهندس سامح فهمى كان عنده رؤية واستراتيجية لكل شخص له ما له وعليه ما عليه كان راجلا وطنيا ودليل ذلك براءة العدالة له.

واثناء تولى المهندس عبدالله غراب كانت مرحلة انتقالية لازم البلد كلها تبان انها متماسكة مش قادر تمشى على استراتيجية معينة كانت مهمتهم الحفاظ على البلد باختلاف شخصياتهم.

■ ماذا عن الخلايا النائمة فى وزارة البترول؟

- ارفض تقييم المواطن انه اخوان او مش اخوان فيه مجموعة من الاخوان بتعمل الارهاب وهم موجودين فى السجون حاليا احنا بلد فيه ديمقراطية لازم كلنا نتكاتف واللى يثبت إدانته يتحاسب وماينفعش نصنف الناس على حسب انتمائهم من تثبت ادانته يقدم للعدالة ليحاسب.

انا خلال فترة عملى فى بتروجت ادعى انه عندى خبرة شوية ولما عرض عليا تولى شركة اوف شور قبلت.

■ ما رأيك فى التغييرات الأخيرة فى القطاع البترولى.. ودور الأجهزة الرقابية؟

- يعنى مجلس الادارة لازم يكون من الشركة لانه هيكون عنده خبرة فى المجال دا ودى كانت مشكلتى فى شركة p.s مش كل مجلس الادارة متخصصين فى البترول لازم يكون مجلس الادارة من العاملين فى قطاع البترول.

الجهات الرقابية لا بد من وجود فنيين بها مش معنى انه يكون فيه فساد شخص فى شركة يبقى القطاع كله فاسد.

■ ثمار المؤتمر الاقتصادى فى القريب العاجل ام على الأمد البعيد؟

- دا بيتوقف فى جديتنا فى تنفيذ هذه الاتفاقيات اللتى ابرمت والعقود وليس على الطرف الاخر اللى مضى معانا، لو كنا جادين هنجنى ثمار المؤتمر الاقتصادى فى كل المجالات، ولابد من الجدية والعمل باخلاص لدعم اقتصاد الدولة.

■ هل ترى ان رفع الدعم فى مصلحة المواطن ام ضده؟

- النهارده لما اقولك السفير الامريكى بيمون عربيته اللتر بـ2جنيه وهو بيكلف الدولة 8 جنيهات يبقى طبعا خطأ فادح مع القرار 100% ارفع الدعم مع وصول الدعم لمستحقيه فعلا مينفعش تساوى اللى عنده دخل باللى معندوش نقسم الشعب لفئات من حيث احقيته للدعم. الدعم قبل الرئيس السيسى كان 140 مليار جنيه على 80 مليون مواطن لكل فرد 140 الف جنيه تخيل لو كل واحد من الفقراء اديتلو 5 الاف جنيه فى الشهر من اللى بنتكلم عليه دعم الطاقة اللى انت شايف انه يستحق الدعم اديلوا لما تقولى ان هناك 67 مليونا يستحقون الدعم طبعا هذا تقييم خاطئ.

■ توجد معاهد متخصصة فى مجال البترول لكن لا تسمن ولا تغنى ولا تقدم عمالة للقطاع البترولى..مارأيك؟

- منظومة التعليم الفنى لو هنتكلم صح. وزارة التعليم العالى قالت انها هتعمل كلية الهندسة من غير ما ترجع لوزارة البترول هى محتاجة عمالة قد ايه وجاى تحاسبنى هناك اكثر من 13 جامعة او معهدا بتخرج اكثر من 20 الفا علشان كدا عملوا وزير التعليم الفنى لو هيلبى احتياجات القطاع مفيش مانع ان الشركات زى بتروجت والمقاولون العرب تحتاج المزيد من العمالة ولكن وفقا للشروط والمواصفات المطلوبة.ممكن يكون فيه تعاون بين الشركات الكبرى ووزارة التعليم الفنى ان الشركات تتبنى مدارس معينة ومن خلالها توفر العمالة المطلوبة ليها.

■ لماذا لم يتم الاستفادة من الطاقات البشرية؟

- احنا عندنا مشكلة بنطلع دون النظر لاحتياجات البلد فى حيث اننا محتاجين عمالة المفروض فيه تنسيق بين الوزارات المفروض وزارة التعليم الفنى كانت موجودة من زمان قرار سليم جدا.

■ العاصمة الادارية آليات تنفيذها.. وهل هناك ازمة تمويل؟

- العاصمة الادارية فيها جزء تتحمله الدولة وجزء تتحمله الشركة اللى هتنفذ هتتحمل باقى التكلفة.الجزء الموجود بتاع الدولة مفيش فلوس ولكن الشركة الاماراتية هتنفذ المشروع وهتبيع للقطاع الخاص.

واتمنى ان تحذو جميع الشركات حذو المقاولون العرب عندنا حوالى 25 شركة خدمات فى قطاع البترول اكبرهم بتروجت شركة عندها خبرات متراكمة شركة بقالها 37 سنة بتكسب لكن فيه احسن منها لما تسألنى عن احسن شركة فى مصر هقول المقاولون العرب شغالة فى 18 دولة بتروجت شغالة فى 11 دولة اللى عايز يشتغل هيشتغل وفقا للظروف وايا كانت الظروف.

■ اخيرا كيف تم اختيارك لمنصبك الحالى؟

- كلفنى بالمنصب المهندس هانى ضاحى كان معايا فى شركة بتروجت طوال 30 سنة وزميل شغل وكان عارف ان عندى خبرة فى هذا المجال وبإذن الله سأبذل قصارى جهدى حتى تستعيد الشركة قدرتها الاقتصادية فى السوق المصرى، والمهنية هى التى تساعدالمسئول على تحقيق النجاح للشركة، طالما كان قادرا على تحديد المشكلة، وطرق حلها ولا أحد يحقق النجاح وحده، وانما من خلال منظومة متكاملة.

ومشكلة الكهرباء والغاز من سنين عمالين نضع مسكنات المفروض فى حل المشاكل وان تكون حلولا جذرية، وليس من خلال مسكنات.

ومصر بلد فقير وبنصنع الاسمنت بالغاز والكهرباء مفيش دولة فى العالم بتستعمل الغاز كدا المشكلة عايزة ناس تكون مؤمنة بقضية التصنيع المحلى والاعتماد على الاقتصاد الداخلى وموارد الدولة المختلفة.

ويجب محاسبة المسئول وفقا لعمله فقط وليس وفقا لشخصه.